۷۰ درصد از بست‌های اداره‌های دولتی را جوانان تشکیل می‌دهند

مقام‌های محلی درولایت نیمروز می‌گویند که در دو سال اخیر، ١٢٠٠جوان در اداره‌های دولتى این ولایت استخدام شده اند.

دفتر مقام ولایت نیمروز گفت با آنکه ۷۰ درصد از کارمندان اداره‌های دولتی این ولایت را جوانان تشکیل می‌دهد اما شمار زیادی از جوانان روزانه به دلیل بیکارى، به ایران و دیگر کشورها مهاجرت مى کنند.

نبابر معلومات ارائه شده از سوی برخی منابع در ولایت نیمروز، در حال حاضر بیش از ۴ هزار تَن در اداره‌های دولتى به شمول معارف این ولایت کار مى‌کنند.

انجنیر محمد سمیع والی نیمروز می‌گوید که بعداز تشکیل حکومت وحدت ملى، بیشترین تمرکز روى استخدام جوانان در اداره‌های دولتى در این ولایت بوده است.

وی افزود که جوانان امروز کشور با تکنالوژی عصری روز آشنایی نسبتا کامل دارند و از سویی هم درجه تحصیلی شان قابل ملاحظه است، مى‌توانند در اجراى امورات سپرده شده بهتر بدرخشند.

او یادآور شد که ۳۵ درصد از فرصت‌های شغلی در اداره‌های دولتی برای خانم‌ها تخصص داده شده است.

از سویى هم حمیدالله بلوچ مسئول امور جوانان ولایت نیمروز با تایید این موضوع گفت که در حال حاضر فرصت‌های شغلی برای جوانان بسیار زیاد است.

با آنکه فرصت‌های شغلی در بخش‌های مختلف اداره‌های دولتی در سراسر کشور ایجاد شده اما هنوز هم دیده می‌شود که روزانه ۱۰ها جوان از سراسر کشور به شمول ولایت نیمروزى، کشور را ترک مى کنند.

یک تن از کارمندان ریاست امور مهاجرین ولایت نیمروز که نخواست نامی از وی گرفته شود گفت که روزانه ٢۵٠٠ تا ٣٠٠٠ تن که اکثر آنها جوانان می‌باشند، جهت دریافت کار از راه‌هاى غیرقانونی از مرز این لایت، به ایران و پاکستان مى‌روند.

وی به این باور است که ۵ درصد از این افراد را جوانان ولایت نیمروز تشکیل می‌دهند.

بیشتر بخوانید: