مسئولان محلی ولایت قندوز تأیید کرده‌اند که بیش از ۲۰۰ جنگجوی خارجی به شمول ۴۰ تاجیکستانی در مرز افغانستان و تاجیکستان، جابجا شده‌اند.
به گفته آنان، جنگجویان تاجیکستانی تحت فرماندهی “مصطفی تاجیک” در سرحد دو کشور فعالیت دارند.
امان الدین قریشی، ولسوال امام صاحب‌ولایت قندوز گفته است که بر اساس اطلاعات موجود، حدود ۲۰۰ جنگجوی خارجی در نواحی مرزی افغانستان و تاجیکستان مستقرند و حتی در آن‌سوی دریای آمو، پناهگاه ساخته‌اند.
آقای قریشی افزوده که انجینیران تاجیکستانی در این ساحه طالبان را در ساخت ماین کنار جاده نیز آموزش می‌دهند.
به گفته وی، جنگجویان خارجی هنگام عملیات نیروهای امنیتی افغان، در آن‌سوی دریای آمو در منطقه موسوم به قلم گذر “جنگلات مربوط به تاجیکستان” پناه می‌برند.
برای نخستین بار است که از ایجاد پناهگاه‌های طالبان در مرز تاجیکستان و افغانستان پرده برداشته‌شده است. قبل از این تنها از حضور تروریستان در مرز دو کشور گزارش‌شده بود.