مقام‌های ریاست امور خارجه در ولایت بدخشان از بازگشایی مجدد کنسولگری تاجیکستان در این ولایت خبر دادند. به گفته سید نبی‌الله رسولی، رییس این اداره در نتیجه تلاش‌های وزارت امور خارجه و نمایندگان مردم، دولت تاجیکستان وعده داده که به‌زودی کنسولگری خود را در فیض‌آباد، مرکز ولایت بدخشان بازگشایی کند.
وی افزود که تاجیکستان اخیراً در ولایات بدخشان و کندوز به دلیل تهدیدات امنیتی کنسولگری‌هایش را بست که این موضوع سبب افزایش مشکلات باشندگان این ولایت به‌خصوص مردم ولسوالی‌های مرزی بدخشان گردید.
به گفته رسولی، وزارت خارجه تاجیکستان یک دیپلماتش به نام اقبال را به‌عنوان جنرال قونسل در ولایت بدخشان معرفی کرده که مکتوبش به وزارت خارجه کشور رسیده است.
وی اظهار امیدواری می‌کند که کنسولگری تاجیکستان در ولایت کندوز نیز به‌زودی به روی شهروندان این ولایت گشوده شود.
این در حالی است که پس از مسدود شدن کنسولگری‌های تاجیکستان در ولایات بدخشان و کندوز، روزانه صدها تن به هدف اخذ ویزای این کشور به ولایات بلخ و کابل سفر می‌کنند.