گزارش‌ها می‌رساند که محمد اشرف غنی، رییس‌جمهور کشور با امام علی رحمان، رییس‌جمهور تاجیکستان در حاشیه نشست شانگهای دیدار و گفتگو کرده است.
رییس‌جمهور تاجیکستان، از پروسه کابل در راستای تأمین امنیت در افغانستان حمایت کرده است.
در خبرنامۀ ارگ ریاست‌جمهوری آمده است: ” که آقای رحمان در دیداری با محمد اشرف غنی رییس‌جمهور افغانستان شام دیروز در آستانه پایتخت قزاقستان روی گسترش روابط دو جانبه تاکید کرده است”.
به اساس خبر دیگر، رییس‌جمهور غنی در دیدار عصر دیروز با همتای ازبکستانی‌اش “شوکت میرضیایف” هراس‌افگنی را خطر جدی برای همه کشورهای منطقه دانسته و همکاری ازبکستان را در بخش برقراری صلح و ثبات در افغانستان مهم خوانده است.
سازمان همکاری‌های شانگهای با عضویت چین، روسیه، قزاقستان، ازبکستان، تاجیکستان و قرقیزستان در سال ۲۰۰۱ میلادی و باهدف برقرار کردن موازنه در برابر نفوذ آمریکا و ناتو در منطقه، ایجاد شد.
هم اکنون افغانستان، بلاروس، ایران، مغولستان از کشورهای ناظر این سازمان محسوب می‌شوند.

روسای جمهور افغانستان و تاجیکستان دیدار کردند