مقام‌های حکومتی تاجیکستان امروز اعلام کردند که شمار نیروهای این کشور در مرز با افغانستان را برای جلوگیری از تهدیدهای امنیتی، بیش‌تر کرده است.
مقام‌های حکومتی این کشور گفته‌اند که آنان همچنان ده‌ها پاسگاه امنیتی را در مرز با افغانستان به‌زودی ایجاد می‌کند.
محمد الُغ خودژایف، سخنگوی پولیس مرزی تاجیکستان گفته که این اقدام به دنبال افزایش تهدیدهای امنیتی از سوی تروریستان، فعالیت قاچاق‌بران اسلحه و اختطاف‌چیان صورت می‌گیرد.
وی افزوده که برای جلوگیری از تهدیدها، کشورش نیروی بیش‌تر در نزدیکی مرز با افغانستان مستقر کرده، اما وی در مورد تعداد این نیروها جزئیات نداده است.
مقام‌های تاجیکستان می‌گویند که ادامۀ جنگ در شمال افغانستان تهدیدهای امنیتی در این کشور را بیش‌تر کرده است.
گفته می‌شود که تاجیکستان پس از افزایش ناامنی در شمال افغانستان و قندوز مرز این کشور، به امنیت مناطق مرزی با افغانستان تمرکز بیش‌تر کرده است.
تاجیکستان سال گذشته نیز پس از درگیری گروهی از مهاجمان با پولیس مرزی این کشور در مرز با افغانستان، تدابیر امنیتی در نواحی مرزی دو کشور را تشدید کرده بود.
همچنان پیش‌تر روسیه و تاجیکستان مانور نظامی مشترک شامل هزار زره‌پوش، دستگاه‌های توپخانه و ۲۳ طیاره جنگی برای جلوگیری از تهدیدها در این کشور برگزار کردند.