مقام‌های امنیتی تاجیکستان با ابراز نگرانی از وضعیت امنیتی نقاط مرزی این کشور با افغانستان اعلام کرده‌اند که یک واحد ویژه نظامی شناسایی را در مرز با افغانستان ایجاد می‌کنند.
رجب‌علی رحمان علی، فرمانده نیروهای مرزی تاجیکستان گفته که مسئولیت این واحد نظامی نظارت و بررسی دقیق، از فعالیت‌های مرزی خواهد بود.
به گفته او، در نخست قرار است حدود ۱۰۰۰ نظامی در چارچوب این واحد فعالیت خود را آغاز کنند.
رحمان علی، وضعیت امنیتی در مناطق مرزی میان افغانستان و تاجیکستان را “پیچیده و نگران‌کننده”خوانده است.
بر اساس گزارش‌ها، طرح ایجاد واحد نظامی ویژه در خطوط مرزی افغانستان– تاجیکستان از سوی پارلمان و مجلس سنای این کشور، تصویب‌شده است.
افزایش ناامنی در شماری از ولایات شمالی، همواره نگرانی مقام‌های دولتی تاجیکستان را به دنبال داشته است.
در حال حاضر طالبان در شماری از مناطق ولایات شمالی به‌ویژه قندوز و بدخشان (هم‌مرز با تاجیکستان) فعالیت دارند.