مقام‌های تاجیکستانی از فعالیت گروه‌های هراس‌افگن و قاچاقبر در منطقه ابراز نگرانی کرده‌اند.
رییس مجلس عالی تاجیکستان گفته است که هراس‌افگنان ثبات در منطقه را تهدید می‌کنند و به همین دلیل باید گام‌های عملی برای ریشه کن کردن گروه‌های هراس افگن برداشته شود.
در خبرنامۀ وزارت خارجه آمده است: ” شکورجان ظهروف، رییس مجلس عالی تاجکستان در هنگام دیدار با صلاح الدین ربانی، سرپرست وزارت امور خارجه این سخن را گفته است”.
در این میان، این مقام تاجیکستانی بر همکاری مشترک در امر مبارزه با گروه‌های هراس افگن در منطقه تاکید کرده است.
در خبرنامۀ این وزارت هم چنین آمده است: ” این مقام تاجکستان، روی گسترش همکاری‎ها در بخش‎های اقتصادی، تجارتی ، ترانزیتی و انرژی میان افغانستان و تاجیکستان نیز تاکید کرده است”.
این گفته‌ها در حالی بیان می‌شود که صلاح الدین ربانی روز چهارشنبه بنابر دعوت مقام‌های تاجیکستانی به شهر دوشنبه سفر کرده است.
به باور کارشناسان سیاسی، مقام‌های تاجیکستانی به شدت از حضور گروه داعش در منطقه نگران هستند و به همین دلیل در تلاش بوجود آوردن همگرایی منطقه‌ای برای مهار تهدیدهای گروه داعش هستند.

تاجکستان: هراس‌افگنان تهدیدی برای ثبات منطقه هستند