مانور نظامی مشترک نظامیان تاجیکستان و روسیه به هدف کسب آمادگی دربرابر گروه‌های تروریستی درمناطق مرزی تاجیکستان و افغانستان آغاز شد.
این مانور نظامی، صبح امروز در پنج نقطه در ولایت ختلان تاجیکستان آغاز شد.
رسانه‌های تاجیکستان به نقل از منابع وزارت دفاع این کشورگزارش دادند که مرحله اصلی این تمرینات نظامی با حضور دو هزار نیروی نظامی روسیه و حدود ۴۸ هزار نیروی نظامی تاجیکستان در رزمایشگاه های “حربمیدان”، “سنبله”، “مومیرک”، “حلقیار” و “لاهور” واقع در ولایت ختلان با بکار بردن جدیدترین سلاح‌ها و روش‌های جنگی و با استفاده از جنگنده‌های هوایی شروع شده است.
گفته می‌شود که برای اولین بار، در این مانور نظامی مشترک، از جنگنده‌های بمب افکن ۹۵ T استفاده خواهد شد.
وزارت دفاع تاجیکستان گفته که این مانور نظامی تا ۲۰ مارچ ادامه خواهد یافت و سپس، نتایج آن توسط مقام‌ها و نهادهای نظامی تاجیکستان و روسیه بررسی می‌شود.
هدف اصلی این مانور نظامی، مبارزه علیه تروریسم و اتخاذ تدابیر عملی در حالت‌های اضطراری دربرابرگروه‌های تروریستی بیان شده است.
این نخستین مانور نظامی فراگیر در سال جاری میلادی است که نه تنها ساختارهای نظامی تاجیکستان و نظامیان پایگاه ۲۰۱ روسیه، بلکه از نیروی ذخیره گارد ملی و نمایندگان مقام‌های دولتی تاجیکستان نیز استفاده می‌شود.